G2M ਜਲੰਧਰ 26 ਜੂਨ 24:-

ਲੋਕਰਾਜ

ਐ ਲੋਕ ਰਾਜ

ਸੁਣਿਐ :

ਤੇਰੀ ਆਮਦ ਨਾਲ

ਕੂੜ ਨਿਖੁਟ ਜਾਂਦੈ

ਫਤਿਹ ਸੱਚ ਦੀ

ਹੋ ਜਾਂਦੀ ਹੈ

ਤੇ ਫੈਲ ਜਾਂਦੀ ਹੈ :

ਸਰਬ ਦਿਸ਼ਾਵਾਂ ਅੰਦਰ :

ਖੁਸ਼ਬੂ,ਰੌਸ਼ਨੀ, ਜ਼ਿੰਦਗੀ ।

ਤੇਰੀ ਇਹ ਸ਼ੋਭਾ ਸੁਣ ਕੇ ਹੀ

ਅਸੀਂ ਤਾਂ ਰਹੇ ਖੜੋ

ਵਿਚ ਬਰੂਹਾਂ

ਸਦੀਆਂ ਤੀਕਣ

ਹੱਥਾਂ ਦੇ ਵਿਚ

ਫੁੱਲਾਂ ਦਾ ਗੁਲਦਸਤਾ ਲਈ

ਕਾਸ਼ ! ਆ ਜਾਵੇਂ ਜੇ ਕਿਤੇ ।

ਪਰ ਤੂੰ ਨਾ ਆਇਆ

ਸਿਕੰਦਰ ਅਤੇ ਅਬਦਾਲੀ ਆਏ

ਪਹਿਣ ਮਖੌਟਾ ਤੇਰਾ

ਹਰ ਵਾਰ

ਇਹੋ ਜਿਹਾ ਹੀ ਕੋਈ

ਐਰਾ ਗ਼ੈਰਾ ਨੱਥੂ ਖੈਰਾ ਆਇਆ

ਲੋਕ ਰਾਜ :

ਤੂੰ ਨਹੀਂ ਆਇਆ

ਉਂਝ ਤਾਂ ਹੁਣ ਵੀ

ਹਰ ਚੌਥੇ ਪੰਜਵੇਂ ਵਰ੍ਹੇ

ਆਉਂਦੀ ਹੈ ਕਨਸੋਅ

ਤੇਰੇ ਆਉਣ ਦੀ

ਤੇ ਫੇਰ

ਪਲ ਭਰ ਅੰਦਰ

ਚਕਾ-ਚੌਂਧ ਜਿਹੀ

ਛਾ ਜਾਂਦੀ ਹੈ ।

ਇਕ ਇਕ ਛਿਣ ਦੇ ਅੰਦਰ

ਤਿੰਨ ਤਿੰਨ ਮੋਟਰ ਗੱਡੀਆਂ

ਤੇਰੀ ਆਮਦ ਦਾ ਐਲਾਨ ਕਰਦੀਆਂ

ਅੱਖਾਂ ਅੱਗੋਂ ਗੁਜ਼ਰਦੀਆਂ ਨੇ : ਨ ਇਸ

ਉਹ ਆ ਰਿਹਾ ਹੈ .

ਆ ਰਿਹਾ ਹੈ

ਆ ਰਿਹੈ

ਮਹਿਕ ਉਠਦੈ ਗੁਣ-ਗੁਣਾ ਉਠਦੈ

ਧਰਤੀ ਦਾ ਹਰ ਜ਼ਰਾ

ਤੇਰੀ ਆਮਦ ਸੁਣ

ਹੋ ਜਾਂਦੈ ਦੀਵਾਨਾ ।

ਪਰ ਹਰ ਵਾਰ

ਚੋਣਾਂ ਦੇ ਖਤਮ ਹੋ ਜਾਣ ਤੋਂ ਬਾਦ

ਮਰੀ ਹੋਈ ਮੱਛੀ ਦੀ ਬਦਬੂ

ਜਦ ਚੌਪਾਸੇ ਫੈਲ ਜਾਂਦੀ ਹੈ :-

ਤਾਂ ਹੁੰਦਾ ਹੈ ਅਹਿਸਾਸ

ਕਿ ਐ ਲੋਕਰਾਜ :

ਇਸ ਵਾਰ ਵੀ

ਤੂੰ ਨਹੀਂ ਆਇਆ

ਬਦਲ ਕੇ ਭੇਸ ਤੇਰਾ

ਫੇਰ ਕੋਈ

ਕੁਬੇਰ ਹੈ ਆਇਆ ।