ਜਾਲੰਧਰ G2M 24ਜੂਨ 24:-

ਜ਼ਿੰਦਗੀ- |||

ਲਓ ਦੇਖੋ :

ਅੱਧੀ ਰਾਤ ਨੂੰ

ਫੇਰ ਧੂਆਂ ਉਠਿਆ ਹੈ ।

ਅੱਗਾਂ-ਬੰਬਾਂ

ਨਾਲ ਚੌਪਾਸੇ

ਮੱਚ ਗਿਆ ਹੈ ਕੋਹਰਾਮ ਜਿਹਾ ।

ਜ਼ਾਲਮ-ਰਾਖਸ਼-ਖੂੰਨੀ-ਹਤਿਆਰਾ

ਮਨੁੱਖੀ ਖੋਪਰੀਆਂ ਵਿਚ

ਭਰ-ਭਰ, ਲਹੂ-ਪਿਆਲੇ

ਗਟ-ਗਟ ਕਰਕੇ ਪੀਵੇਗਾ

ਭਾਂਬੜ ਲਾਊ - ਅੱਗ ਮਚਾਊ

ਸਾਰਾ ਕੁਝ ਜਲ ਜਾਏਗਾ

ਬੱਕਰੇ ਬਲਾਉ ਰਾਤ ਭਰ

ਇਹ ਮਾਰੂ ਕਿਲਕਾਰੀਆਂ : ਕਿ

ਜ਼ਿੰਦਗੀ ਦਾ ਕਰ ਦਿੱਤਾ ਹੈ

ਸਰਵਨਾਸ਼ ਮੈਂ

ਹਮੇਸ਼ ਕਾਲ ਲਈ

ਬੜੀਆਂ ਸ਼ੇਖੀਆਂ ਮਾਰੇਗਾ

ਜ਼ਾਲਮ ਹੰਸਿਆਰਾ

ਸਵੇਰ ਹੁੰਦੇ ਸਾਰ ਹੀ ਪਰ

ਹੋ ਜਾਏਗਾ ਹੈਰਾਨ - ਪਸ਼ੇਮਾਨ

ਕਿਉਂਕਿ ਗਲੇ-ਸੜੇ-ਧੁਖ ਰਹੇ

ਰਾਖ ਦੇ ਚੌਗਿਰਦੇ ਵਿਚੋਂ

ਮੈਂ ਬਣ ਕੇ,ਕਰੂੰਬਲ ਨਵੀਂ ਇਕ ਫੁੱਟਾਂਗੀ

ਜੜ੍ਹ-ਤਣਾ-ਪੱਤੇ-ਫੁੱਲ ਤੇ ਫਲਾਂ ਸੰਗ ਲਹਿਰਾਂਦਾ

ਬਿਰਖ ਮੈਂ ਬਣ ਜਾਵਾਂਗੀ

ਤੇ ਮੇਰੇ ਪੱਤਿਆ ਨੂੰ -

ਛੇੜਦੀਆਂ ਸੰਦਲੀ ਹਵਾਵਾਂ

ਫੇਰ ਸਰਗਮ ਗਾਉਣ ਗੀਆਂ

ਚੌਪਾਸੇ ਜ਼ਰੇ ਜ਼ਰੇ ਅੰਦਰ

ਮੈਂ ਜ਼ਿੰਦਗੀ

ਫੇਰ ਖੁਸ਼ਬੂ-ਬਹਾਰ-ਤੇ ਜੀਵਨ ਬਣਕੇ

ਛਾ ਜਾਵਾਂਗੀ

ਛੋਟੇ ਬਾਲ ਇਆਣੇ ਰਲ-ਮਿਲ

ਗਾਉਣਗੇ ਪੀਂਘਾਂ ਪਾਉਣਗੇ ਕਿੱਕਲੀਆਂ

ਅਤੇ ਝੂੰਮਰ ਪਾਉਣਗੇ ।

ਕੈਦੇ ਖਰੀਦਣਗੇ,ੳ ਅ ੲ ਪੜ੍ਹਨਗੇ

ਫੇਰ ਸਿਖਰ ਤਕ ਪਹੁੰਚ ਜਾਣਗੇ ।

ਮੌਤ ਦੀ ਜਕੜ ਵਿਚ

ਜਨੂੰਨੀ ਹੰਸਿਆਰੇ ਦੀ ਪਕੜ ਵਿਚ

ਮੈਂ ਜ਼ਿਆਦਾ ਦੇਰ

ਰਹਿ ਨਹੀਂ ਸਕਦੀ ਗੁਲਾਮ

ਜਿਸ ਦਿਸ਼ਾ ਵਲ ਜਾਵਾਂਗੀ

ਮੌਤ ਬੋਰੀ-ਬਿਸਤਰਾ ਲਪੇਟ ਜਾਏਗੀ

ਤੇ ਫੇਰ ਸਰਬ ਦਿਸ਼ਾਵਾਂ ਵਿਚ

ਮੈਂ ਹੀ ਮੈਂ

ਫੈਲ ਜਾਵਾਂਗੀ -

ਨਾਮ ਮੇਰਾ ਹੈ ਜ਼ਿੰਦਗੀ !